一年一度既書展又黎啦，咁大型既活動點可以唔去呢？大熱天時除左涼冷氣同消磨時間之餘，仲可以執平書。除左So記之外，今次都係台北旅行既原班人馬。

今朝又係7點就起左身，完左placement都無覺好訓，之後去街市同麵包店買左早餐同午餐準備係書展入面食，今日再一次係我同阿wing最早出現係海港城門外等佢地黎，今日天氣依然好好，仲記得上一個月既今日就係我地去台灣既一日.......真係好想快d到29號。

今年書展感覺上比上年少人，係我既錯覺定今日係平日既關係呢？唔洗點等已經用八達通比左$10，書展搞左咁多年，真係一年比一年smooth，唔洗點等已經可以入到hall1。次次都係咁，一入到去睇既永遠都唔會係書，而係一堆堆既人牆圍住晒d書。

除左hall1叫做值得行之外，行到hall2同grand hall真係有d無奈，有一半既鋪係賣VCD同精品，更加離譜係連水晶果d都有！hall5就.....兒童天地唔岩我行。今日最驚喜都行到一半接到K人電話，SAO 會fund每人大約$900！對於荷包已經元氣大傷既我黎講直頭係一個恩典。結果今日既收成係4本書，分別係《看誰在說謊》、《攝影構圖》、《男人來自火星，女人來自金星》同《台北旅遊全攻略》，總共都係用左大約$140左右。

行左total 9個鐘，攰死，之後坐返船返海港城諗住去food court食，點知果到d野食貴得黎又唔吸引，最後去左麵藏到食，$43一個豬頸肉拉麵 + 餃子 + 雪碧，d豬頸肉同豬骨湯底真係幾好味，食完之後又黎true or dare，唔知係唔係上次台灣上完性教育返黎，今日d問題都難唔開e個話題.......。

今日實在太攰啦，一上到車就訓著左，係巴士總站落車既時間，眼尖既阿wing發現到汽水機d 燈著晒，就即刻禁左罐可樂出黎，唔知邊個咁好人請我地飲野呢？